سنه‌وبه‌ر
حه‌مه‌سه‌عید حه‌سه‌ن



ئاخۆ وه‌چه‌كانی نیرۆن
له‌به‌رده‌م كێوی وره‌تا
چۆن له‌رزینێ له‌رزی بن،سنه‌وبه‌ر؟
له‌به‌رده‌م كڕكانی قین و تووڕه‌ییتا
چۆن به‌زینێ، به‌زی بن، سنه‌وبه‌ر؟
       *
كه ده‌بینی
خوێندكارانی ئه‌م وڵاته
یه‌خه‌ی شه‌قامیان گرتووه،
خه‌نجه‌ری ده‌بانی تۆڵه
كێلانی به‌جێ هێشتووه،
كه‌ده‌بینی هاوڕێیانت ده‌یانه‌وێ
ته‌می خه‌م بڕه‌وێته‌وه،
تاڤگه بۆ شاخ،
ماسی بۆ چه‌م،
زمان بۆ ده‌م،
جووتیار بۆ گوندی دێرینی بچێته‌وه،
له خۆشیدا مه‌زاره‌كه‌ت جێده‌هێڵی و
سه‌ما ده‌كه‌ی، سنه‌وبه‌ر.
      *
ببووره لێم
كه‌ناتوانم شیعرێ بڵێم
شیاوی باڵای تۆ بێ،
ئه‌گه‌ر شیعرێ هه‌ر دێرێكی هه‌ڵۆیه بێ،
هه‌ر حه‌رفێكی پشكۆیه بێ،
هێشتا ده‌ستی ناگاته داوێنی تۆ،
گه‌شتر نابێ له دڵۆپێ خوێنی تۆ.

حه‌مه‌سه‌عید حه‌سه‌ن   (1982)



 

هۆ مه‌رده‌كه‌ی گردی یاره
ئاگادار بووی ئه‌م به‌هاره،
قه‌ڵغان به‌رۆكی كچان بوو
بۆ شه‌سته‌بارانی گولله؟
ئاگادار بووی سوپای زه‌روو
به‌ربووه خوێنی ئه‌م شاره؟
ئاگادارب بووی جۆگه‌له‌ی خوێن
له‌بناری سه‌یوانه‌وه
ڕوی كرده شار؟
چاوی منداڵ
نیشانه بوو بۆ چنگی داڵ؟
هۆ مه‌رده‌كه‌ی گردی یاره،
هۆ پیره‌مێرد!
ئاگادار بووی گه‌ردن نه‌ده‌ترسا له كێرد؟
قه‌ڵای وره‌ی (دایه ئامین)
به‌رز بوو وه‌ك لوتكه‌ی سه‌فین؟
سه‌ری بڵندی (سنه‌وبه‌ر)
گه‌یشتبووه ئاستی هه‌ور؟
ماندووی قه‌دی باوه‌ڕی بوون
خێڵی ته‌ور؟
       *
تۆیه بروسكه له تیشكی
چاوی گه‌شت بترسێ،
په‌تی سێداره له پرچت،
گولله له سنگی سه‌ركه‌شت بترسێ،
زنجیر له پێت،
دار له له‌شت بترسێ،

 

 

ماڵه‌وه

Copyright 2004 pshdar.com

بۆدواوه